beshankovichy.by

Информационный портал

Социальные сети:

Новости Бешенковичей Культура

09.11.2019 19:59

131 просмотр

0 комментариев

На малой радзіме Алеся Адамовіча за народныя грошы ўсталявалі першы ў Беларусі помнік клясыку

Бюст Алеся Адамовіча (1927–1994) паставілі ля глушанскага Дому культуры на вуліцы Кастрычніцкай, якую ў 1996 годзе пасялковы савет і мясцовыя жыхары хацелі перайменаваць у вуліцу Алеся Адамовіча. Улады тады ініцыятыву не ўхвалілі.

Праз 22 гады паставіць бюст пісьменьніка пагадзіліся, але грошы на яго ахвяравала грамадзкасьць. Выраб і ўстаноўка абышліся ў 6,5 тысяч даляраў, якія былі сабраныя ў 2018 і 2019 гадах. Аўтары бюста скульптары Гэнік Лойка і Яўген Білей. Ініцыяваў зьбіраньне грошай жыхар Бабруйску Андрусь Архіпенка.

/**/ /**/
ГЛЯДЗІЦЕ ТАКСАМА:

20 нечаканых фактаў пра Алеся Адамовіча. Сёньня яму споўнілася б 90 гадоў

Дачка Алеся Адамовіча: У зьяўленьні бюста таты заслуга моладзі

9 лістапада ў Глушу, якая за 20 кілямэтраў ад Бабруйску, на адкрыцьцё першага ў Беларусі помніка аўтару несавецкай «Вайны пад стрэхамі» сабралася землякі Адамовіча, грамадзкія актывісты з Бабруйску, Магілёва, Менску, а таксама кіраўнікі Бабруйскага райвыканкаму. На ўрачыстасьці была і дачка пісьменьніка Натальля Адамовіч.

Натальльля Аляксандраўна ля бюста расплакалася. У інтэрвію Свабодзе прызналася, што ня верыла ў ажыцьцяўленьне праекту.

Натальля Адамовіч са скульптарам Гэнікам Лойкам ля бюста Алеся Адамовіча

«Гэта заслуга моладзі, якая сабрала грошы і дамаглася ўсталяваньня помніка, — кажа дачка пісьменьніка. — Я дапамагала парадамі і фотаздымкамі. Я рада, што ёсьць у нас такая моладзь. Можа зь ёй і да адкрыцьця музэю дойдзем. Сёлета 25 год як няма майго таты і так выйшла, што ў гэты год зьявіўся ў ягонай роднай Глушы ягоны бюст».

Андрусь Архіпенка: усталяваньне бюста Алеся Адамовіча паспрыяе росту цікавасьці да ягонай творчасьці

Увекавечыць памяць пра Алеся Адамовіча ўсталяваньнем яго бюста жыхар Бабруйску Андрусь Архіпенка загарэўся два гады таму. Ён задаволены вынікамі працы сваёй ініцыятыўнай групы. Андрусь адзначае, што ажыцьцявіць задуманае без падтрымкі Глушанскага сельскага савету не ўдалося б.

Паводле яго, нягледзячы на аднолькавыя працэдуры ўзгадненьня, паставіць помнік у горадзе было б складаней, паколькі ў ім існуюць грамадзкія групы, да якіх улада ставіцца насьцярожана.

На адкрыцьці бюста Адамовічу ў Глушы

Андрусь спадзяецца, што са зьяўленьнем помніка цікавасьць да творчасьці Алеся Адамовіча ўзрасьце, а Глуша стане прыцягальнай для турыстаў.

«Я заўважыў такую тэндэнцыю, — кажа Андрусь, — што цяперашняе пакаленьне мала ведае пра Алеся Адамовіча. А калі няма грамадзкага запыту і інтарэсу, то ўлада ня будзе асабліва напружвацца, каб зьмяніць сытуацыю».

Лявон Баршчэўскі: помнікі сапраўдным беларускім героям рана, ці позна — зьявяцца

Прыехаў у Глушу перакладчык і грамадзкі дзеяч Лявон Баршчэўскі. Ён кажа, што ўсталяваньне бюста Адамовіча важная падзея для беларускай культуры, бо помнікам нацыянальным дзеячам не хапае.

Бюст Адамовічу ў «поўны рост»

«Васілю Быкаву, акрамя, як каменя на могілках помнікаў няма наагул, — нагадвае Лявон Баршчэўскі. — Помнікі нашым сапраўдным героям, апосталам нацыі рана, ці позна — зьявяцца. Яны будуць больш дасканалыя, паколькі цяпер магчымасьці ўшанаваньня іншыя, чым былі калісьці».

Ідэоляг Бабруйскага райвыканкаму: пакуль Глуша без музэю Адамовіча

Начальнік аддзелу ідэалягічнай працы Бабруйскага райвыканкаму Галіна Чарнова лічыць, што лепшага месца для бюста Адамовіча, чым пляцоўка ля Дома культуры, у пасёлку цяжка адшукаць.

«Яно праглядаецца з усіх бакоў і прайсьці, не зьвярнуўшы ўвагі на яго прыгажосьць нельга,— кажа яна, — таму я шчасьлівая, што на ім стаіць гэты бюст».

Старшыня Глушанскага сельскага савету Марыя Сушчанка, Натальля Адамовіч плача і ініцыятар усталяваньня бюста Аляксей Архіпенка

Першапачаткова яго меркавалі паставіць ля будынка старой аптэкі, якая на той жа вуліцы, што і Дом культуры. Там зьбіраліся разьмясьціць музэй пісьменьніка.

Па словах Галіны Чарновай пытаньне пра стварэньне музэю застаецца актуальным, але на дабрачынным рахунку, адкрытым у 2016 годзе, сабрана замала грошай, каб адрамантаваць аварыйны будынак. Паводле чыноўніцы, цяпер прапрацоўваецца варыянт разьмяшчэньня ў Доме культуры экспазыцыі пра жыцьцё і творчасьць Алеся Адамовіча.

Будынак аптэкі, у якім зьбіраюцца ствараць музэй Алеся Адамовіча

Колькі на рахунку грошы высьветліць не ўдалося. У 2018 годзе гаварылася пра 5950 даляраў

/**/ /**/
ГЛЯДЗІЦЕ ТАКСАМА:

Бабруйскі райвыканкам: Інтарэс да музэю Адамовіча згасае, ахвяраваньняў не чакаецца

Зь іх 5 тысяч ахвяравала Нобэлеўская ляўрэатка Сьвятлана Алексіевіч. Гэта была дзясятая частка патрэбных на рамонт сродкаў.

Старшыня сельскага савету Марыя Сушчанка: бюст Адамовіча — гэта пачатак

Старшыня Глушанскага сельскага савету Марыя Сушчанка называе бюст Адамовіча — народным помнікам. Да яго адкрыцьця рыхтаваліся амаль год. Яна перакананая, што з часам зьявіцца і музэй Алеся Адамовіча ў Глушы.

Дом, у якім жыла сям’я Адамовічаў, калі ў Глушу прыйшлі нацысты. Насупраць аптэка, у якой працавала маці Адамовіча — Ганна Мітрафанаўна

«Для гэтага трэба ўсім прыкласьці крыху больш намаганьняў, — кажа яна. — Бюст Адамовіча — гэта пачатак у стварэньні музэю „Вайны пад стрэхамі“. Ён будзе ня толькі пра Алеся Адамовіча, але і жыхароў, якія выжылі ў вайну. »

Як ушанаваць памяць Алеся Адамовіча

— Вуліцы названыя ў яго гонар ёсьць ў Стаўбцы, Барысаве, Івацэвічах, а таксама ў мястэчку Калодзішчы;

— Носіць ягонае імя і вуліца ў Глушы. Вядзе яна да мясцовай школы. Цэнтральная ж вуліца з ажыўленай шашою застаецца Кастрычніцкай. У 1996 годзе прапанову пасялковага савету і мясцовых жыхароў аб перайменаваньні яе ў вуліцы Адамовіча падтрымаў Беларускі ПЭН-цэнтар, якім тады кіраваў Васіль Быкаў, і Беларускі саюз пісьменьнікаў, на чале якога стаяў Уладзімер Някляеў. Мясцовая ўлада ініцыятыву не падтрымала.

На магіле Алеся Адамовіча

—- У Маскве ў завулку Вялікі Кахіхінскі ў 1996 годзе ўсталявалі мэмарыяльную шыльду;

— У 2018 годзе ў Глушы зьявіўся арт-аб’ект «Прыпынак Адамовіча». На прыпынку грамадзкага транспарту намаляваны партрэт пісьменьніка і цытатай з аповесьці «Vixi».

Памёр Алесь Адамовіч 26 студзеня 1994 году ў Маскве. Пахаваны на глушанскіх могілках

/**/ /**/
ГЛЯДЗІЦЕ ТАКСАМА:

На радзіме Алеся Адамовіча, аўтара несавецкай «Вайны пад стрэхамі»

https://www.svaboda.org

Последние новости