beshankovichy.by

Информационный портал

Социальные сети:

Новости Бешенковичей Общество

22.01.2021 15:30

454 просмотра

0 комментариев

Жыццё бешанковіцкай глыбінкі, або пра што на Усебеларускім народным сходзе не раскажа Генадзь Шведаў

Сярод удзельнікаў Усебеларускага народнага сходу ад Бешанковіцкага раёна будзе Генадзь Шведаў, старшыня Бешанковіцкага раённага Савета народных дэпутатаў. На гэтай пасадзе ён адбывае ўжо трэці тэрмін, а выбіраюць яго ў дэпутацкі корпус пастаянна выбарцы ад Сокараўскай выбарчай акругі № 24.

Як сведчыць райвыканкамаўскі сайт, Сокараўская выбарчая акруга №24 размяшчаецца "в границах населённых пунктов Улльского сельсовета: Сокорово, Мартиново, Полуозерье, Хотино, Слобода, Дыбали, Гали, Сапеги, Гарани, Бычково, Шапчино, Ермоловщина, Муравщина, Жданово, Прудины, Ульяновка, Дворники, Шаурино, Бортники 1, Бортники 2, аг. Улла: ул. им. Романова, Доватора, пер. Мостовой."

Хай вас не здзіўляе такая вялікая колькасць вёсак па гэтай выбарчай акрузе. Рэч у тым, што ў Сапегах, Бычкове, Мураўшчыне, Прудзінах, Дворніках і Шавурыне даўно аніхто не жыве. А яшчэ ў васьмі вёсках пражывае толькі па 1--2 чалавеку. І толькі ў шасці вёсках гэтай акругі пражывае больш за 10 чалавек. Але і тыя шэсць апошніх вёсак сёння руйнуюцца.

Лепш за ўсё пра жыццё акругі гаворыць той факт, што цяпер на тэрыторыі акругі няма аніводнай навучальнай установы. Паўазерскую сярэднюю школу зачынілі яшчэ 7 гадоў таму. А сёння ў адзінай паблізу ляжачай навучальнай установе -- Вульскай сярэдняй школе -- навучаецца толькі 77 дзетак (у тым ліку і вульскіх). Яшчэ 21 дзіця наведвае Вульскі дзіцячы сад.

У гэтым рэгіёне пазарасталі дарогі паміж вёскамі, якія некалі былі бойкімі. Даволі вялікія палі не апрацоўваюцца, а пакрысе зарастаюць баршчэўнікам. (Здымкі, якія вы ўбачыце ніжэй, зробленыя мной у ліпені 2017 года, але стан спраў з таго часу, думаецца, не палепшыўся. На здымках -- парослыя рамонкамі неараныя палі.)

У гэтым выміраючым рэгіёне не толькі пазачыненыя, а нават ужо пазакапаныя ў зямлю магазіны, там, дзе яны яшчэ нядаўна былі: у Хоціне, Слабадзе, Паўазер'і і Фролкавічах. Два апошніх закапалі не пазней як паўгода таму.

У Сокараве ў студзені гэтага года цалкам разбурылі фельчарска-акушэрскі пункт: там ужо выразалі паравое атапленне і выдралі падлогу. І сёння, каб набыць лекі, адзінокаму пенсіянеру з далёкай вёскі трэба дабірацца да Вулы. А як дабірацца? Сёння, 22-га студзеня 2021 года, дарогі праз большасць вёсак гэтай акругі (калі яны не на трасе Бачэйкава - Вула) не чышчаныя ад снегу.

У нядаўнім артыкуле ў "Зары", які прысвечаны Шведаву, ёсць слушныя думкі, выказаныя аўтаркай Ларысай Паўлоўскай: "Рэалізацыя дзяржаўнай праграмы адраджэння і развіцця вёскі змяніла аблічча многіх населеных пунктаў, размешчаных у сельскай мясцовасці: з’явіліся аграгарадкі, пабудавана новае жыллё, адрамантаваны аб’екты сацкультбыту. Але праблемы, асабліва ў аддаленых ад райцэнтра населеных пунктах, застаюцца. Як паказвае само жыццё, каб моладзь заставалася ў вёсцы, недастаткова выдзеліць чалавеку жыллё і даць працоўнае месца. Трэба стварыць яшчэ і годныя, камфортныя ўмовы. А калі ў населеным пункце, скажам, зачыняюцца нейкія аб’екты, сям’я з’едзе туды, дзе функцыянуюць школа, дзіцячы сад, аддзяленне сувязі, бальніца або ФАП. Па магчымасці іх трэба захоўваць."

Здаецца, ёйныя словы і справы ў нашай сокараўскай акрузе цалкам разыходзяцца. Хто зменіць тут сітуацыю да лепшага? Хто раскажа пра наша сапраўднае жыццё на Ўсебеларускім народным сходзе?

Г.Станкевіч

Последние новости